Rigimar cikin gidan da ake fama da ita tsakanin Darektoci da shugaban APC na kasa, Abdullahi Adamu ya gagara zuwa karshe har zuwa yau. Darektocin da ake zargin an tsige sun zargi Sanata Abdullahi Adamu da amfani da wasu asusun banki ba tare da sanin ‘yan kwamitinsa na NWC ba.
Wata majiya tace wadannan Darektoci sun fitar da jawabi, suna tuhumar Adamu da yawo da kudi da kuma cire N3bn daga cikin wasu boyayyun asusu.
Mutum biyar daga cikin Darektocin jam’iyyar sun musanya zargin da ake yi na cewa kwamitin Mai Mala Buni ya bada shawarar a kore su daga aiki.
Bugu da kari, Darektocin sun karyata ikirarin da Abdullahi Adamu yake yi na gadon bashin N7.5bn daga hannun Buni wanda ya rike APC kafin zuwansa. An rahoto wadannan mutane da aka sallama sun ce asali ma shugaban jam’iyyar ya bude boyayyun asasu a banki, yana cire kudi ba da sanin NWC ba.
Jawabin ya kara da cewa shugaban jam’iyyar ya cire wadannan N3,000,000,000 ne ba tare da amincewar NEC ba, kuma a lokacin Darektocin ba su kan kujera. Har ila yau, Darektocin sun musanya zargin cewa akwai ma’aikatan bogi a sakatariyar jam’iyyar APC a lokacin da shugabannin rikon kwarya ke ofis.
Abdullahi Adamu, ya musanya zargin da Darektocin suke yi masa, yace babu wani abin da ya yi da ba tare da amincewar NWC ba. Sanata Abdullahi Adamu yace Darektocin ‘yan kanzagin wasu ne, kuma ba zai biye masu ba.
