<span;>Sanatan da ke wakiltar Mazabar Sanatan Borno ta Kudu, Ali Ndume, ya ce ana iya shawo kan matsalar rashin tsaro da ke addabar Najeriya cikin watanni shida idan Gwamnatin Tarayya ta nuna cikakken ƙwazo da himma.
Ndume ya bayyana hakan ne a ranar Litinin yayin wata hira da aka yi da shi a shirin Politics Today na gidan talabijin na Channels Television, inda ya nuna damuwa kan ƙarin tsananin hare-hare da tashe-tashen hankula da ake fama da su, musamman a yankin Arewa maso Gabas.
Dan majalisar ya jaddada cewa, fiye da korafi, abin da ake bukata shi ne ɗaukar matakan gaggawa da kuma samun cikakken ƙudirin siyasa wajen magance matsalar.
“Ba batun korafi ba ne. Ba kuma batun cewa a tambayi wani kamar ni, a matsayina na sanata, in bayyana dalilin da ya sa waɗannan abubuwa ke faruwa ba. Ni a kullum na yi imani cewa idan Shugaban Ƙasa da Gwamnatin Tarayya ta Najeriya sun ɗauki wannan batu da muhimmanci, za a iya kawo ƙarshen wannan matsala ta rashin tsaro cikin watanni shida,” in ji Ali Ndume.
“Abin da muke bukata kawai shi ne a horar da sojojinmu, a ba su kayan aiki na zamani, a ba su makamai masu kyau, sannan a ƙara musu ƙwarin gwiwa,” in ji Ndume.
Sanatan ya nuna damuwa kan ci gaba da rasa jami’an soja, ciki har da manyan hafsoshi, yana mai cewa hakan na nuna akwai manyan matsalolin gudanar da aiki a fannin tsaro.
“Bayan sun kashe kwamandojinsu, yanzu su ma suna dawowa suna kashe kwamandojinmu, kuma har yanzu suna ɗaukar sojoji kusan biyar, shida ko ma bakwai. Har yau ma, a arewacin Borno, mun rasa wani kanal, kamar yadda na ji, tare da wasu sojoji. Wannan bai kamata ya ci gaba ba. Wannan ne yanzu matsalar,” in ji shi.
Solace base ta ruwaito cewa Ndume ya danganta tabarbarewar matsalar tsaro da rashin daidaito da kuma rashin cika aiwatar da tsare-tsaren tsaro.
“Matsalar tsaro da ke ƙara ta’azzara ta samo asali ne daga ƙalubale da barazana, da kuma ayyukan da aka ɗauka amma ba a kammala su yadda ya kamata ba. Dole ne mu kasance masu tsanani a kan wannan batu; dole ne mu aiwatar da abin da muke faɗa,” in ji shi.
