lokuta da dama jiki na shiga damuwa sakamakon gajiya da ke faruwa a sanadiyar rashi hutu da takura jikin da mai jikin ya ke yi. Za kaga mutum ya yi aiki tun daga sanyin safiya har zuwa goshin Magriba, amma maimakon ya ba wa jikin sa hutun da ya dace sai kaga mutum ya shiga wata harkar daban da jikin nasa zai ci gaba da aiki
Daga Khadeeja S A Dan Maliki
Da zarar jiki ya tara gajiya sai ka ga ya fitar da sakamakon abinda aka yi masa na takura, wato sai wata matasala ta kamu da jikin. irin su Mura, Ciwon Kai da dan karamin zazzabi.
Wani kwarraren likita mai suna, Dakta Chijindu Nkuche ya bayyana cewa wadannan ‘yan cututtuka da takura jiki ke kawo wa, bacci mai nauyi kuma nisattse zai iya maganinsu ba sai an sha wani maganin asibiti ba.
Sai dai kuma idan jiki ya ci gaba da karbar damuwa da razanin gajiya da ciwon jiki na tsawon lokaci, to fa yana iya haifar da ciwon zuciya da kuma tabin hankali wadanda matsaloli ne da za su iya kai mutum lahira
Hanyoyin da zaka iya bi dan magance wadannan matsalolin sun hada da
1. Fitarwa kanka da wani tsari na lokacin barci da akalla za ka samu baccin sa’a biyu ko sama da haka kafin karfe 12:00 dare. Kuma in ka fitarwa da kanka lokacin baccin, sai ka mayar da wannan lokacin al’adarka
2. In kwa in ka kwanta, amma sai ka samu zuciyarka tana ta kai koma kan wasu abubuwa da har suka saka bacci ya ki daukarka, sai ka tashi ka dauki takarda da biro/fensir ka rubuta wadannan matsaloli da ke damunka, tare da daukar matakin kawo karshensu a kashe-gari in ba haka ba kuma haka za su ci gaba da kawo maka farmaki a duk lokacin da ka ke kwance ka ke shirin bacci
3. Sha bakin shayi, domin bakin shayi na taimakawa wajen kashe sinadarin cortisol da ke taruwa sakamakon damuwa don ya sanya mutum cikin yanayin damuwar
4. Tauna cingam domin shi cingam na saisaita yanayi tare da motsa wasu jijiyoyin da damuwa ke rikewa. Sau tari za ka samu wanda ke cikin damuwa ba ya samun karsashin iya yin tauna, to, kai sai ka samarwa kanka wannan yanayi
5. Dabi’antu da yawaita yin ajiyar zuciya, wannan na samarwa da zuciya sauki tare da rage mata lodin aikin da ta ke yi a lokacin. A takaice dai yawaita ajiyar zuciya na taimakawa wajen saisaita gudun jini
6. Samarwa kanka wani dalili da zai sa ka yi dariya a lokacin damuwa ko gajiya. Dariya na sauko da sinadin Endorphin daga kwakwalwa. Shi kuma sinadrin Endorphin na taimakawa wajen kyautata yanayi
7. Guji kallon talabijin har cikin tsakiyar dare
8. Sanya shudin kwan fitila a dakinka. Shi shudin haske bisa wani bincike na jami’ar Harvard, yana fayyacewa jiki lokacin da ya kamata jikin ya kasance yana cikin yanayin bacci, lokacin da ya kamata ya farka, lokacin da ya kamata mutum ya mike daga shimfidarsa, lokacin da jiki ya kamata ya nemi abinci ko abin sha
Kar ka jira sai gajiya da damuwa sun kai ka kas, kare kanka daga illarsu
