Saurayin arziƙi shi ne mai ɗa’a da biyayya ga Allah, mai mayar da hankali a kan ibada, mai neman ilimin addini da na zamani, mai dagewa matuƙa wajen neman na kansa cikin hanyar halal, mai kaucewa duk wani abu na sabawa Allah da duk wani abu na rashin tarbiyya da zubar da mutunci
Daga B.imam
RelatedPosts
Daga cikin halinsa: Yana gujewa munanan ɗabi’u kamar; ƙarya, zamba, cin amana da yaudara. Ba ya yaudarar ƴan mata da yi musu alƙawarin auren ƙarya don ya yi wasa da hankalinsu, ba ya aikawa yan mata saƙo ko faɗa musu maganganu na batsa da sunan soyayya, idan shi aka turawa zai ƙyamaci abun, domin shi mai gujewa fanɗararrun ƴan mata ne masu kai mutum ga halaka, sannan yana kiyaye abota da abokai marasa tarbiyaya da mutunci, kuma mutum ne mai kyawun magana da kyawun zamantakewa da mutane
Shi saurayin arziƙi ba shi da jibi ko alaƙa da shaye-shaye da yawon banza, ba ya daga cikin masu aikata abubuwan rashin tarbiyya da ake kiransu wayewar zamani. A takaice saurayi nagari kawwamamme ne mai hankali da sanin ya kamata.
Ka yi kokari ka zama mai kyawun ɗabi’u, ya Allah ka kara tsaremu daga munanan dabi’u
