An fitar da wasu muhimman bayanai kan wata sabuwar daftarin yarjejeniya tsakanin Iran da Amurka dangane da tsagaita wuta da kuma shirin nukiliya.
Ga muhimman abubuwan da ke cikin wannan shawarwari:
Iran ta amince da dakatar da haɓaka sinadarin uranium na tsawon shekaru 15, sai dai kawai don bincike a kan na’urorin samar da isotopes na magani.
Adadin uranium da Iran ke da shi mai ƙarfin kashi 60% da 20% za a raba shi gida biyu: wani bangare za a mayar da shi man fetur na na’urar nukiliya, yayin da wani za a rage ƙarfinsa zuwa matakin ƙasa. Duk da haka, ba za a fitar da shi daga Iran ba.
Hukumar kula da makamashin nukiliya ta duniya (IAEA) za ta samu cikakken iko wajen sa ido kan duk wuraren nukiliyar Iran.
Za a buɗe mashigar ruwa ta Hormuz, tare da yiwuwar karɓar kuɗin wucewa.
Amurka za ta fara sassauta takunkumin tattalin arziki kan Iran a hankali.
Amurka za ta saki duk wasu kadarorin Iran da aka daskarar a ƙasashen waje, waɗanda suka kai akalla dala biliyan 20 ko fiye.
Amurka za ta rattaba hannu kan yarjejeniyar rashin kai hari ga Iran, wacce za a tabbatar da ita ta hanyar kudurin Majalisar Tsaron Duniya ta Majalisar Ɗinkin Duniya da kuma yarjejeniya da Majalisar Dokokin Amurka za ta amince da ita.
Amurka za ta janye dukkan dakarunta daga yankin Tekun Fasha (Persian Gulf).
Majiyar rahoto: Amit Segal, Channel 12 na Isra’ila.
